safnahus

Sjómannamessa

Wed, 03 Jun 2026 13:22:00 GMT

7. júní kl. 11:00

Verið velkomin í Sjómannamessu.

Sjómannamessa verður haldin á vegum Njarðvíkursóknar á sjómannadaginn 7. júní kl. 11:00 í Bíósal Duus safnahúsa.

Félagar úr Kór Njarðvíkurkirkju leiða söng við undirleik Rafns Hlíðkvist organista og sr. Brynja Vigdís Þorsteinsdóttir þjónar. Að lokinni stund verður gengið að minnismerki sjómanna við Hafnargötu þar sem lagður verður blómakrans frá Verkalýðs- og sjómannafélagi Keflavíkur og nágrennis og Félagi skipstjórnarmanna.

Í boði verða kaffi og nýsteiktar kleinur í Duus safnahúsum Einnig gefst gestum kostur á að skoða bátalíkön Gríms Karlssonar í Bryggjuhúsi ásamt öðrum sýningum safnahúsanna.

Allir sjómenn og fjölskyldur þeirra eru boðin sérstaklega velkomin við messuna.

Ósamhverf Endurskoðun - Steingrímur Eyfjörð

Wed, 03 Jun 2026 13:18:52 GMT

30. maí – 16. ágúst 2026

Það er til brandari meðal heimspekinga, eða kannski er það ekki brandari, sem hljóðar svo: við eigum orð yfir grænt. En orðið er ekki liturinn. Liturinn er til og er einhversstaðar á milli augans og heilans, þar sem við komum okkur saman um að kalla upplifun. Orðið er bara samkomulag um að orðið grænn, sé grænn.

Wittgenstein helgaði síðari hluta ferils síns þessu vandamáli: hvaða hugtök tungumálið nær yfir og hvernig mörk málsins marka heim hvers og eins. Hann kemur fram í sýningunni sem spurningarmerki (Wittgenstein?) þar sem greinarmerki vinnur raunverulegt heimspekilegt starf sem fyrirspurn. Gildir ramminn enn? Steingrímur Eyfjörð hefur varpað þessari spurningu fram í gegnum allan sinn feril.

Tveir þátttakendur fá lituð gleraugu. Í gegnum þau horfa þau á sama hlutinn og eru svo beðin um að koma sér saman um hvaða lit þau sjá, og búa til orð fyrir hann saman. Orðið sem samkomulagið nær yfir er sameiginlegt, en upplifunin á bakvið orðið er það ekki. Það sem verkið afhjúpar er að við sjáum ekki sama litinn til að byrja með, og að tungumálið smættar upplifun litarins í sameiginlegt hugtak sem virðir einstaklingsbundna skynjun að vettugi. Þetta er dæmigert fyrir listferil Steingríms: hann er ekki að segja þér eitthvað, heldur er hann að fá þig til að gera eitthvað, og þú situr eftir með það sem gjörðin afhjúpar.

George Brecht skildi áhorfandi sem fylgdi fyrirmælaverki hefur þegar skapað listaverk; að höfundarréttur er ekki eign heldur flutningur. Marcel Duchamp hélt því fram að skapandi gjörðir skiptast á milli þess sem gerir og þess sem tekur á móti. Steingrímur þekkir báðar þessar hliðar, að hlutir eru túlkaðir á mismunandi vegu eftir hlutverki.

J.L. Austin, heimspekingurinn sem gaf okkur hugtakið um gjörningsyrðing, á sér jafn vel stað hér. Hugmynd hans var að setningar lýsa ekki, en eru frekar gjörðir og atburðir í sjálfu sér: Ég lofa. Ég lýsi yfir. Þær eru aðgerðir sem orð. Sum verk Steingríms gefa fyrirmæli, sum mjög flókin ef þeim er fylgt bókstaflega. En leiðbeiningarnar hafa þegar gert eitthvað: þær hafa sett þig stöðu sem þú þarft að taka afstöðu. Muntu? Muntu ekki? Af hverju ekki? Hvort sem þú gerir eða gerir ekki er jafn merkingarbært.

Er hægt að vekja listaverk upp frá dauðum? Spurningin hangir í loftinu án kaldhæðni. Ef enginn fylgir tilmælum verkanna, er verkið þá til? Og ef einhver gerir það, hvað er þá raunverulega að birtast: verkið eða manneskjan sem stígur inn í það?

Það þýðir í raun að við erum ekki hér sem áhorfandi, eða ekki eingöngu. Þessi verk tala beint til okkar (gerðu þetta, stattu hér, horfðu aftur, svaraðu) og það sem þau biðja um er virk þátttaka. Það sem vekur forvitni er bilið milli verksins og framkvæmdar þess, milli leiðbeininganna og gjörðarinnar, milli þess sem tungumálið lofar og þess sem það getur í raun staðið við.

Steingrímur Eyfjörð (f. 1954) hefur verið virkur myndlistarmaður frá áttunda áratug síðustu aldar og í verkum sínum hefur hann unnið með fjölbreytta miðla, margvíslegt efnisval og ólík viðfangsefni. Steingrímur hefur haldið fjölmargar einkasýningar síðan 1977, ásamt því að vera valinn til þess að taka þátt í fjölda samsýninga bæði hér á landi og erlendis. Þar má meðal annars nefna viðamikla sýningu á verkum hans í Listasafni Íslands árið 2006. Steingrímur var fulltrúi Íslands á Feneyjartvíæringnum árið 2007 með verkið Lóan er komin sem samanstendur af 13 sjálfstæðum verkum. Árið 2017 var hann sæmdur titlinum bæjarlistamaður Hafnarfjarðar. Steingrímur hlaut Menningarverðlaun DV fyrir myndlist árið 2002 og var tilnefndur til Carnegie Art Award árin 2004 og 2006.

Steingrímur lauk námi við kennaradeild Myndlista- og handíðaskóla Íslands 1971–1975 og einnig deild í mótun árið 1978 undir handleiðslu Magnúsar Pálssonar og Robert Filliou. Hann lærði við Edinborgarháskóla árið 1977 og nam grafík við Ateneum Suomen Kuvataideakatemian Koulu, Helsinki 1979–1980. Steingrímur stundaði framhaldsnám í nýmiðlum við Jan van Eyck Academie, Maastricht, Hollandi 1980–1983. Hann hefur starfað við kennslu og tekið þátt í félagsstarfi myndlistarmanna. Steingrímur býr og starfar í Reykjavík

Sýningarstjóri: Daría Sól Andrews.

Sýningin er styrkt af Myndlistarsjóði, Launasjóði listamanna, Myndstef og Safnasjóði.

Ómur - Erla Þórarinsdóttir

Wed, 03 Jun 2026 13:16:58 GMT

30. maí – 16. ágúst 2026

Málverk Erlu Þórarinsdóttur byggja á samspili ljóss, efnis og tíma. Þau vísa til innri veruleika og eru einskonar teikn og tákn. Verkin eru í líkamsstærð og mæta áhorfandanum sem dyr eða speglar. Yfirborð þeirra eru breytileg eftir birtuskilyrðum og nærveru þess sem stendur fyrir framan þau. Blaðsilfrið sem Erla vinnur með, oxast og umbreytist með tímanum. Silfrið sem er ljós- og umhverfisnæmt bregst við súrefni, brennisteini og öðrum efnum sem eru í andrúmsloftinu. Verkin eru hlaðin orku og virkni sem áhorfandinn gæti upplifað. Orkan er abstrakt, óhlutbundin og býr í skynfærunum.

Að lifa og búa í öðrum löndum hefur haft áhrif á sýn og skilning Erlu. Hún flutti ung með fjölskyldunni til Norðurlanda og lærði snemma að heimurinn hefði mismunandi myndbirtingar, en kjarni mannsins væri sá sami. Hún leyfir undirvitundinni að starfa — hlustar, skynjar og treystir.

Litir búa yfir tíðni, og tíðni er líka orka. Guðfræðingurinn og höfundur bókarinnar Thought Forms , Annie Besant skrifaði: „Litur er birtingarmynd krafts”. Ómur litanna í verkum Erlu mætir auganu og smýgur inn í líkamann.

Geometrísk form birtast í endurtekningu og í kol- og blýantsverkum má sjá samfelldar línur og tákn sem virðast bæði skrásetja hreyfingu og halda henni gangandi. Inn í ferlið blandast orð og hugtök; skvaldur samtímans. Eins og spurningin Kärnkraft eller kärlek, „kjarnorka eða kærleikur“ ósvöruð og sífellt aðkallandi. Verkin draga inn í sig óstöðugleika heimsins, pólitíska spennu og mannlega viðkvæmni án þess að festa sig við einn ákveðinn atburð eða tíma. Þar mætast ógn og von, eyðileggingarmáttur og samkennd, sameining sála, Saman.

Járnteikningarnar og stálverkið Saman eru verk unnin og útfærð á þessu ári.

Í Kúríósa , innsta rými sýningarinnar eru skissubækur, ljósmyndir, skúlptúrar og teikningar sem varpa ljósi á feril Erlu til þessa. Safn tilrauna og sjónbrota frá ólíkum stöðum, tíðaranda og menningarheimum. Þar birtast vísbendingar um uppruna verkanna og innsæi listamannsins.

Erla Þórarinsdóttir er fædd í Reykjavík 1955. Hún nam við Konstfack Listaháskólann í Stokkhólmi og Gerrit Rietveld Academie í Amsterdam. Erla hefur starfað á Norðurlöndunum, í New York um tíma og einnig dvalið í Kína. Hún á að baki fjölda einkasýninga og samsýninga á Íslandi og erlendis. Verk eftir Erlu eru í eigu helstu safna landsins. Hún hefur hlotið ýmsa styrki og viðurkenningar fyrir verkin sín, m.a. unnið samkeppni fyrir Ráðhús Reykjavíkur og hefur tvisvar hlotið styrki úr sjóði Pollock-Krasner Foundation í Bandaríkjunum.

Sýningarstjórar: Helga Þórsdóttir and Helena Solveigar Aðalsteinsbur.

Sýningin er styrkt af Safnasjóði.

Leiðsögn og listamannaspjall

Wed, 22 Apr 2026 14:46:59 GMT

23. apríl kl. 15:00

Skáldasuð ljóða – og listahátíð í Reykjanesbæ er haldin 9.-26. aprí. Hátíðin fagnar myndlist og ljóðlist og haldnir hafa verið hefðbundnir ljóðaupplestrar í Bíósal Duushúsa og í Bókasafni Reykjanesbæjar.

Ljóð eru út um allan bæ í matvörubúðum, á göngustígum og í sundlaugum einnig er sýning í Bíósal Duushúsa en fimmtudag 23. apríl á sumardaginn fyrsta verður listamannaspjall og leiðsögn kl.15.

Gleðilegt sumar.

Listamannaspjall: Tumi Magnússon

Wed, 15 Apr 2026 09:30:07 GMT

19. apríl kl. 14:00

Nú er síðasta vika sýningar Héðan þangað þaðan hingað eftir Tuma Magnússon, sem lýkur 19. apríl. Á síðasta sýningardegi, sunnudaginn 19. apríl, verður Tumi með listamannaspjall í safninu sem hefst klukkan 14:00.

Sýningin Héðan þangað þaðan hingað er sýningarstýrð af Gavin Morrison og kynnir verk myndlistarmannsins Tuma Magnússonar. Í verkum sínum fjallar hann um tíma, hreyfingu og hið hversdagslega flæði tilverunnar, þar sem breyting er eina festan.

Ferðalag, ganga og endurtekning eru gegnumgangandi þemu í sýningnunni. Með þeim umbreytir hann heimspekilegum þversögnum um sjálf, tíma og breytingu í ljóðræna og skynræna upplifun.

Sýningin er styrkt af Myndlistarsjóði.

Bíókvöld – vortónleikar Kvennakórs Suðurnesja

Wed, 15 Apr 2026 09:21:28 GMT

15. & 19. apríl kl. 20:00

Bíókvöld Kvennakórs Suðurnesja verða haldin miðvikudaginn 15. apríl og sunnudaginn 19. apríl í Bíósal Duus safnahúsa. Kórinn ætlar þó ekki að sýna bíómyndir heldur munu kórkonur flytja tónlist úr þekktum kvikmyndum á vortónleikum sínum þetta árið. Dagskráin er fjölbreytt og inniheldur gleði, hlátur og grátur eins og gerist í góðum bíómyndum. Má þar nefna kvikmyndir á borð við Harry Potter, Frozen, Bohemian Rhapsody, Shrek, The Greatest Showman, Karlakórinn Heklu og svo mætti lengi telja. Kórkonur hafa notið þess að æfa þetta skemmtilega prógramm í vetur og eru spenntar að deila því með tónleikagestum. Forsala miða er á Facebook-síðu kórsins og hjá kórkonum. Einnig verður miðasala við innganginn.

Stjórnandi Kvennakórs Suðurnesja er Dagný Þ. Jónsdóttir og meðleikari á píanó er Geirþrúður F. Bogadóttir. Auk þess fær kórinn til liðs við sig á tónleikunum þá Jón Árna Benediktsson bassaleikara, Sigurð B. Ólafsson gítarleikara og Magnús Má Newman trommuleikara.

Lifandi laugardagar í Duus safnahúsum

Tue, 27 Jan 2026 16:11:48 GMT

Komdu með fjölskylduna og taktu þátt í Lifandi laugardögum – skemmtilegri röð listasmiðja, vinnusmiðja, sögustunda eða annarra viðburða þar sem börn og fullorðnir skapa saman og njóta notalegrar stemningar í Duus safnahúsum. Smiðjurnar eru haldnar á völdum laugardögum frá kl. 13:00 - 14:00 og henta öllum aldri. Ókeypis aðgangur.

Opnun: Tumi Magnússon

Fri, 16 Jan 2026 16:05:03 GMT

17. janúar kl 14:00

Við bjóðum ykkur velkomin á sýningu Tuma Magnússonar, Héðan þangað þaðan hingað, laugardaginn 17. janúar kl. 14:00 - 16:00 í Listasafni Reykjanesbæjar.

Tumi Magnússon (f. 1957) býr og starfar í Kaupmannahöfn og Reykjavík. Í verkum sínum fjallar hann um tíma, hreyfingu og hið hversdagslega flæði tilverunnar, þar sem breyting er eina festan.

Á sýningunni má sjá lykilverkið Kaffi og hland (1998–99), röð átta málverka sem sýna örfín litbrigði frá kaffibrúnum til pissuguls og fanga tímann sem kyrra, en um leið óstöðuga heild. Einnig eru sýnd nýrri vídeó- og hljóðverk á borð við Tímaréttingarlaglínur (2021–25) og Almenningssamgöngur (2020–25), þar sem einfaldar athafnir og ferðir eru samstilltar í taktfastar, tónrænar samsetningar.

Ferðalag, ganga og endurtekning eru gegnumgangandi þemu í verkum Tuma. Með þeim umbreytir hann heimspekilegum þversögnum um sjálf, tíma og breytingu í ljóðræna og skynræna upplifun.

Gavin Morrison er sýningarstjóri.

Opnunartími Duus safnahúsa yfir hátíðirnar

Wed, 17 Dec 2025 16:10:35 GMT

23.12 Þorláksmessa 12:00 - 17:00

24.12 Aðfangadagur LOKAÐ

25.12 Jóladagur LOKAÐ

26.12 Annar í jólum LOKAÐ

27.12 Laugardagur 12:00 - 17:00

28.12 Sunnudagur 12:00 - 17:00

29.12 Mánudagur LOKAÐ

30.12 Þriðjudagur 12:00 - 17:00

31.12 Gamlársdagur LOKAÐ

1.1 Nýarsdagur LOKAÐ

2.1 Föstudagur 12:00 - 17:00

Við þökkum ykkur fyrir ánægjulega samveru á árinu sem er að líða.

Óskum ykkur gleðilegra jóla og farsældar á nýju ári.

Jól í Duus safnahúsum

Wed, 03 Dec 2025 13:42:34 GMT

4. - 23. desember kl. 12:00 - 17:00

Ævintýraleg jólasöguspjöld, föndur og óskalistasmiðjur fyrir börn og fjölskyldur. Í desember bjóða Duus safnhús uppá notalega jólasamverustund, hægt er að föndra jólaskraut, skrifað óskalista til jólasveinanna og lesið um jólahefðir Duus húsa fyrr á tíðum.

Henta öllum aldurshópum og góða leið til að kynnast jólum liðinna tíma og taka þátt í skapandi samveru.

Áki Granz - samtal um list og minningar

Wed, 12 Nov 2025 10:00:04 GMT

Sunnudaginn 16. nóvember kl. 14:00

Samtal um sýningu Áka Granz – með Karveli Granz

Sunnudaginn 16. nóvember kl. 14:00 býður Listasafn Reykjanesbæjar til áhugaverðs viðburðar þar sem Karvel Granz segir frá sýningu föður síns, Áka Granz, og veitir gestum einstaka innsýn í hugarheim listamannsins.

Þetta er kærkomið tækifæri til að kynnast verkum Áka nánar og heyra sögur úr lífi og listsköpun hans frá syni hans sjálfum.

Aðgangur ókeypis – öll velkomin!

Komdu og njóttu hlýlegs samtals um list og líf.

Skapandi laugardagar með Freyju Eilíf

Wed, 12 Nov 2025 09:56:00 GMT

Nóvember í Listasafni Reykjanesbæjar

Alla laugardaga í nóvember kl. 13–14 býður listakonan Freyja Eilíf upp á fjölbreyttar og litríkar listsmiðjur fyrir börn í Listasafni Reykjanesbæjar. Efniviður á staðnum og frítt inn!

Laugardagurinn 1. nóvember – Grímugerð í anda Dags hinna dauðu

Komdu og taktu þátt í skemmtilegri og litríka listsmiðju í grímugerð með listakonunni Freyju Eilíf, innblásinni af mexíkósku hátíðinni Degi hinna dauðu!

8. nóvember – Fljúgandi töfrateppið!

Föndrum töfrateppi með klippimyndaaðferð – hægt að leika með eða hengja upp á vegg!

15. nóvember – Plánetur: Málarasmiðja

Við förum í skapandi geimferð í litum og formum!

22. nóvember – Gluggastjörnur

Ljúf og ljómandi smiðja þar sem við búum til stjörnur til að hengja í glugga.

29. nóvember – Jóla listsmiðja

Sköpun og jólaföndur í hátíðlegum anda!

Komdu og njóttu skapandi laugardaga með Freyju Eilíf – þar sem ímyndunaraflið fær að fljúga frjálst!

50 ár frá fyrsta kvennaverkfallinu

Thu, 23 Oct 2025 15:08:57 GMT

Föstudagurinn 24. október

Föstudaginn 24. október verður kvennaverkfall haldið um land allt. Samtök launafólks ásamt fjölmörgum öðrum baráttusamtökum kvenna og hinsegin fólks standa að deginum, en nú eru 50 ár liðin frá því að konur lögðu fyrst niður störf til þess að krefjast jafnréttis.

Meginmarkmið kvennaverkfallsins er að störf kvenna og kvára séu metin að verðleikum, að kerfisbundnu launamisrétti verði útrýmt og að komið verði í veg fyrir kynbundið ofbeldi.

Starfsfólk Duus safnahúsa tekur þátt í deginum og því verður lokað eftir hádegi föstudaginn 24. október.

Duus safnahús í vetrarfríinu

Thu, 16 Oct 2025 10:59:42 GMT

Dagskrá Duus safnahúsa í vetrarfríinu, 17. - 19. október.

Föstudagur:

12:00 – 17:00 Eldfjallagarður í Gryfjunni: Sýning Reykjanes Geopark í Gryfjunni í Duus safnahúsum leiðir gesti í gegnum jarðsögu Reykjanesskaga með áherslu á eldgos, jarðhita og önnur sérkenni svæðisins. Við ætlum að taka innblástur úr sýningunni og búa saman til eldfjallagarð. Öllum er boðið að koma og föndra eða teikna eldfjall eða annað sem veitir innblástur af sýningu jarðvangsins. Allt efni verður á staðnum

12:00 – 17:00 Ratleikir í Byggðasafni Reykjanesbæjar: Á sýningum Byggðasafns Reykjanesbæjar í Duus safnahúsum eru ratleikir í boði fyrir alla aldurshópa.

Laugardagur:
12:00 – 17:00 Ratleikir í Byggðasafni Reykjanesbæjar.

13:00 – 14:00 Haustlauf, listasmiðja barna. Opin listsmiðja fyrir alla aldurshópa barna, þar sem lauf eru teiknuð eða tekin í gegn með frottage aðferð. Allt efni verður á staðnum.

Sunnudagur:

12:00 – 15:00 Eldfjallagarður í Gryfjunni & Ratleikir í Byggðasafni Reykjanesbæjar

Íslensk þjóðlög í gúmmístígvélum

Wed, 15 Oct 2025 09:59:29 GMT

Sunnudaginn 19. og 26. október kl 16:00

Bíósalurinn í Duus húsum fer að nötra sunnudaginn 19. október kl. 16:00.

Þar verður ekki kvikmynd á ferðinni heldur leiksýning, söngleikhús sem Hanna Dóra Sturludóttir leiðir með tali og tónum. Þannig er að Atli Ingólfsson hefur um ævina notað íslensk þjóðlög í ýmsa rétti, blásið í þau nýju lífi, endursagt eða misskilið á ýmsan hátt. Nú hefur hann tekið tólf útsetningar sínar og raðað saman í sérstakt samfellt verk, auk þess sem í miðjunni trónir hrollvekjandi draugasaga. Auk Hönnu Dóru flytja verkin sönghópurinn Kammeróperan og hljóðfæratríó, þær Bryndís Halla Gylfadóttir, selló, Gerður Gunnarsdóttir, fiðla, og Þuríður Jónsdóttir, flauta, en þær deila vangaveltum, hálfkæringi eða skætingi með Hönnu Dóru. Verkið er bæði broslegt og íhugult, ögrandi og huggandi. Sýningin heitir ÍSL#NSK ÞJÓÐLÖ G og er hluti af Óperudögum.

Miða má nálgast á tix.is eða við innganginn. Önnur sýning verður sunnudaginn 26. október kl. 16:00.

Haustlauf / Autumn Leaves, listasmiðja barna

Wed, 15 Oct 2025 09:46:26 GMT

18. október 2025 kl. 13:00

Opin listasmiðja fyrir alla aldurshópa barna, þar sem lauf eru teiknuð eða tekin í gegn með frottage aðferð.

Efniviður á staðnum.

Umsjón með smiðjunni hefur Freyja Eilíf.

Listasmiðja barna er styrkt af Safnasjóði.

An open art workshop for children of all ages, where leaves will be drawn or traced through the frottage process.

Materials are provided on site.

Teacher is the artist Freyja Eilíf.

The Children's Art Workshops are sponsored by Museum Council of Iceland.

Safnahelgi á Suðurnesjum

Wed, 08 Oct 2025 11:48:32 GMT

11. og 12. október

Safnahelgi á Suðurnesjum sem haldin er árlega, er uppfull af skemmtilegum uppákomum og viðburðum um allan Reykjanesskagann.

Safnahelgin er samstarfsverkefni safna, setra og sýninga á Suðurnesjum sem opna dyrnar sínar fyrir íbúum og gestum svæðisins.

Dagskrá helgarinnar er fjölbreytt og skemmtileg fyrir alla fjölskylduna. Frítt er á öll söfn sem taka þátt.

Nánar á www.safnahelgi.is

Dagskrá Duus safnahúsa á Safnahelgi:

Spjöllum um Ástu málara

Wed, 08 Oct 2025 11:24:56 GMT

Kl. 14:00 laugardaginn 11. október.

Á Safnahelgi á Suðurnesjum bjóða Byggðasafn Reykjanesbæjar og Duus safnahús til spjalls um Ástu málara laugardaginn 11. október kl. 14.

Inga Þórey Jóhannsdóttir sýningarstjóri segir stuttlega frá sýningunni og tilurð hennar, en síðan er opnað fyrir samtal þar sem gestir geta deilt sögum, frásögnum og sjónarhornum sem tengjast Ástu Árnadóttur og verkum hennar.

Við bjóðum hjartanlega velkomna bæði þá sem hafa heyrt af Ástu í gegnum sögur fyrri kynslóða og þá sem einfaldlega vilja kynnast verkum hennar og sögu betur til að taka þátt í þessu opna samtali.

Ásta Kristín Árnadóttir frá Narfakoti í Innri-Njarðvík var óhrædd við að brjóta gegn rótgrónum hefðum um samfélagslegt hlutverk kvenna. Hún lauk prófi í málaraiðn árið 1907 og var þar með fyrsta íslenska konan til að taka próf í iðngrein. Þremur árum síðar hlaut hún meistarabréf í iðninni, fyrst kvenna og Íslendinga.

Hulduefni, leiðsögn sýningarstjóra

Wed, 08 Oct 2025 11:23:39 GMT

Sunnudaginn 12. október kl. 15:00

Hanna Styrmisdóttir sýningarstjóri Hulduefnis, fer um einkasýningu Vilhjálms Bergssonar. Tildrög þessarar sýningar er gjöf Vilhjálms til Listasafns Reykjanesbæjar, sem telur hátt í tvö hundruð verk, frá miðjum 6. áratugi 20. aldar fram á þriðja áratug þessarar aldar. Þar eru olíumálverk í meirihluta, en einnig eru tölvuverk, vatnslitaverk og teikningar hluti af gjöfinni. Eitt verk á sýningunni, Raðferli: 12 nr., kolteikning frá 2021, er í eigu listamannsins og sýnt með leyfi hans.

Sýningin gefur mynd af þróun í verkum Vilhjálms frá 1959 til 2021, og dregur fram fágæta tæknilega færni hans og kunnáttu. Samtöl við Vilhjálm í gerð sýningarinnar, sem og áðurnefnd skrif, hafa gefið sjaldfengna innsýn í stígandi verka hans og það andríki og djúpsæi sem búa að baki. Í skrifunum tekst hann á við rannsókn sína í myndlist samhliða sköpuninni, og fangar með orðum þanka sína um myndlist almennt, áþreifanlega og óáþreifanlega þætti hennar, samtíma og sögu, hefð og byltingu; og hugarástand, þess sem skapar og þess sem skoðar.

Við ferðumst frá fyrstu abstrakt geómetrísku verkunum, í gegnum samlífrænar víddir út í takmarkalaust orkuljósrými á þeim sextíu árum sem sýningin spannar. Vilhjálmur lýsti snemma á ferlinum viðfangsefni sínu í myndlist sem víðtækri hlutdeild; undir hana féll allt milli himins og jarðar, frá minnstu ögn til stjörnuþoka, auk hinna ósæju víðlenda mannshugans. Hann varð ungur fyrir áhrifum af myrkri - gegnsæju gljámyrkri[1] - og ljósi – birtunni á bakvið Þorbjörn[2] - og með einum eða öðrum hætti varð hvort tveggja honum yrkis- og rannsóknarefni í áratugi.

Vilhjálmur Bergsson er fæddur í Grindavík 1937. Hann sótti myndlistarnám í Reykjavík á sjötta áratugnum og hélt að loknu stúdentsprófi frá Menntaskólanum í Reykjavík (1958) til Kaupmannahafnar þar sem hann hélt áfram myndlistarnámi (1958-1960). Þaðan lá leiðin til Parísar þar sem hann stundaði nám við Académie de la Grande Chaumière (1960-1962).

Vilhjálmur varð félagi í SÚM 1969 og formaður þess frá 1971-1972. Hann dvaldi í Kaupmannahöfn 1963-1966 og 1972-1977, Madrid 1967-1968 og í París 1977-1978. Frá 1983-2000 bjó Vilhjálmur og starfaði í Düsseldorf í Þýskalandi. Frá 2000-2024 var Vilhjálmur búsettur og starfaði í Grindavík og hefur nú aðsetur í Vík í Mýrdal.

Vilhjálmur hefur haldið tugi einkasýninga á verkum sínum, m.a. í Gallerí SÚM, Norræna húsinu, Listasafni ASÍ, Listasafni Reykjavíkur, í Orangerie Benrath höll í Düsseldorf og í Galerie AP, Kaupmannahöfn. Þá hefur hann tekið þátt í fjölda samsýninga á Íslandi, í Bandaríkjunum og Evrópu. Verk hans eru m.a. í eigu Listasafns Reykjanesbæjar, Listasafns Íslands, Listasafns Reykjavíkur, Listasafns Háskóla Íslands, Listasafns Gautaborgar, Hässelby kastala í Stokkhólmi, Gentofte Kunstvenner, Charlottenlund og Kunstversammlung í Düsseldorf.

Sýningin stendur til og með 4.janúar 2026.

Hanna Styrmisdóttir er sýningarstjóri Hulduefnis og tímabundið starfandi sérfræðingur í Listasafni Reykjanesbæjar.

Áður hefur Hanna m.a. verið prófessor við myndlistardeild Listaháskóla Íslands, stýrt Listahátíð í Reykjavíkog verið sýningarstjóri Íslenska skálans

á Feneyjatvíæringnum í myndlist.

Hulduefni, einkasýning Vilhjálms Bergssonar er styrkt af Myndlistarsjóði.

Heimsmynd, leiðsögn sýningarstjóra

Wed, 08 Oct 2025 11:23:38 GMT

Sunnudaginn 12. október kl. 14:00

Helga Þórsdóttir sýningarstjóri Heimsmyndar fer um sýningu Áka Gränz, þar sem við fáum tækifæri til að ganga inn í hans drauma, hugleiðingar og ímyndir. Sýningin minnir okkur á að list er ekki aðeins eftirlíking heldur skapandi afl - leið til að gera hið ósýnilega sýnilegt.

Í sýningunni Heimsmynd er horft til Áka Guðna Gränz (1925–2014), alþýðulistamanns sem skapaði sér einstaka stöðu í menningarlífi Njarðvíkur og víðar. Verk hans voru aldrei einungis eftirmyndir af landslagi eða fólki – þau voru persónuleg kortlagning á hugmyndaheimi hans, þar sem draumar, þjóðsögur og minningar blönduðust saman. Í þessum verkum speglast heimssýn manns sem hafði djúpa rót í samfélagi sínu, en líka ríkan innri heim sem hann miðlaði á sinn einstaka hátt.

Áki hefði orðið hundrað ára á þessu ári og heiðrum við minningu hans.

Lýðheilsu- og forvarnarvika

Tue, 30 Sep 2025 15:50:46 GMT

Ókeypis aðgangur í Duus Safnahús í lýðheilsu- og forvarnarviku

Í tilefni lýðheilsu- og forvarnarviku í Reykjanesbæ bjóða Duus Safnahús öllum gestum ókeypis aðgang.

Duus safnahús er frábær staður til að efla sköpunargleði og njóta rólegra stundar í fallegu umhverfi.

Í Duus safnahúsum eru sýningasalir Byggðasafns Reykjanesbæjar, Listasafns Reykjanesbæjar og gestastofu Reykjaness jarðvangs og þar má á einum stað upplifa einstaka blöndu sögu, myndlistar og náttúru.

Opnunartími:

Þriðjudaga-sunnudaga kl: 12:00-17:00

Mánudaga: Lokað

Duus Safnahús þakka gestum fyrir frábæra Ljósanæturhelgi

Wed, 17 Sep 2025 15:05:20 GMT

Duus Safnahús fagnar frábærri Ljósanæturhelgi þar sem um 6.000 gestir sóttu sýningar og viðburði safnahúsanna. Helgin hófst á fimmtudagskvöldinu en þá opnuðu fjórar nýjar sýningar: Hulduefni eftir Vilhjálm Bergsson og Heimsmynd eftir Áka Guðna Gränz í Listasafni Reykjanesbæjar, Endurfundir eftir Rut Ingólfsdóttur í Gryfjunni og Ásta málari í Bíósalnum.

Á laugardeginum fylltust húsin af tónlist, söng og fólki þegar „Syngjandi sveifla“ var á dagskrá en þar komu fram Harmonikuunnendur, Karlakór Keflavíkur, Sönghópur Suðurnesja og Kvennakór Suðurnesja með fjölbreytta tónlistardagskrá.

Sunnudagurinn hófst á sögugöngu um Jamestown-strandið þar sem gestir fengu fræðandi erindi í Bíósalnum áður en haldið var í vettvangsferð um næsta nágrenni safnahúsanna

Við þökkum öllum sem heimsóttu okkur yfir helgina og hlökkum til að sjá ykkur aftur.

Vetraropnun Duus safnahúsa hafin

Wed, 10 Sep 2025 13:31:32 GMT

Frá og með 1. september tók í gildi vetraropnunartímar í Duus safnahúsum. Söfnin eru nú opin þriðjudaga til sunnudaga frá kl. 12:00–17:00, en lokað er á mánudögum. Gestir eru hvattir til að kynna sér fjölbreyttar sýningar safnahúsanna sem sameina listasafn, byggðasafn og Gestastofu Reykjaness jarðvangs.

Fast þeir sóttu sjóinn

Wed, 20 Aug 2025 14:40:20 GMT

Grímur hófst handa við smíði líkananna um fimmtugt og safnaði af mikilli elju ýmis konar fróðleik um sögu sjávarútvegs á Íslandi. Grímur var afkastamikill og eftir hann liggja á fimmta hundrað líkön í eigu ýmissa stofnana og einstaklinga. Fyrir smíði sína var Grímur sæmdur hinni íslensku fálkaorðu árið 2009, Menningarverðlaun Reykjanesbæjar það sama ár og Sjómannadagsorðuna 2002. Grímur lést árið 2017.

Eins manns rusl er annars gull

Wed, 20 Aug 2025 14:38:10 GMT

Á sýningunni eru smáhlutir sem hafa verið framleiddir með ákveðið notagildi í huga. Þegar þeir hafa lokið hlutverki sínu enda þeir oftar en ekki í ruslinu. Til eru þeir sem hafa þó einsett sér að safna slíkum hlutum með það markmið að eignast sem flesta og af mismunandi gerðum. Á sýningunni má sjá smáhluti sem hafa borist Byggðasafni Reykjanesbæjar sem heildstæð einkasöfn eða hluti af öðrum gjöfum.

Annað atriði sem þessir smáhlutir eiga sameiginlegt er að þeir voru fjöldaframleiddir á árum áður en eru margir fágætari í dag. Stór hluti er merktur fyrirtækjum eða vörum og enda voru þeir ýmist gefnir, látnir fylgja með öðrum vörum eða seldir vægu verði. Hér gefst því tækifæri til að rifja upp liðna tíð og virða fyrir sér hvernig myndskreytingar og vörumerki hafa breyst. Elstu munirnir eru frá þriðja áratug 20. aldar en þeir yngstu aðeins nokkurra ára eða áratuga gamlir.